ویݨ وصال
بےنظیر بھٹو دی مُکاݨ
وِسمل پنوار (ملتان)
(1)
اینویں سݨدے ہیں کئی سال اڳیں
ایں راول راٹھ دی پنڈی وچ
جیویں سورج سولی چڑھیا ہا
اونویں چندرمُکھی دھی بھٹو دی
اوہیں سیت سڑئے ہوئے پنڈی وچ
ایں ماء دھرتی دے دھاڑلاں توں
کھا گولی جھول لݙا ڳئی اے
اساں وِسمل "ناں ڳئے" لوکاں دی
ہئی جڳ جیوݨ دی آس ہکا
او وی رُس ڳئی اے، مُکلا ڳئی اے
(2)
اساں جاڳ پئے
اساں ہوند ہمیش دے ویݨ وتیاں
جڳ جیوݨ دی ایہا رمز لدھی
نِت جھل مُکلاوے مِتراں دے
تھئے مونجھ مہاݨے، اساں جاڳ پئے
من اپݨے کوں پچیندیں ہوئیں
اینویں ہنجھڑوں ہار بݨنیدیں ہوئیں
نت سوڳ سنبھال منیندیں ہوئیں
سدا ویݨ وصال کریندیں ہوئیں
تھئے نیر کُماݨے، جاڳ پئے
اِنہاں ݙکھ دیاں ماریاں ڄالیں دے
اِنہاں دُکھدیاں ہوئیاں سالہیں دے
تھئے خاب اُتاݨے، جاڳ پئے
اِنہاں چڑیاں دے چِلکار وچوں
اِنہاں کونجاں دے ݙُسکار وچوں
اِنہاں وراں دے مُݨکار وچوں
اِنہاں ہنساں دے ہنسار وچوں
تھئے سول سیاݨے، جاڳ پئے
مُٹھے ستلج دی مِٹھی لولی دے
نیں چندݨ دی رمجھولی دے
سندھ ساگر دی کہیں چھولی دے
کہیں سانجھ سٻدھ دی ڳولی دے
تھئے نین ݙُکھاݨے، جاڳ پئے
اساں جاڳ پئے اِنہاں پُھلاں وچ
سنگ پکھیاں دے اساں جاڳ پئے
اساں جاڳ پئے رَل وسدیاں وچ
سنگ سکھیاں دے اساں جاڳ پئے
اساں جاڳ پئے ماء جھولی وچ
ماء ٻولی وچ اساں جاڳ پئے
اساں جاڳ پئے
No comments:
Post a Comment