آصف علی زرداری دی "ایگونیسٹک پالیٹکس"
اڄوکے سیاسی ہیجان دے ماحول وچ سیاست تے سیاست دانیں سانگے کوئی "اکیڈیمک" ڳالھ کرݨ اوکھا لڳدے۔ اے اصول آصف علی زرداری تے سروں پَھٻدے۔ اوندے پورے جیوݨ وچ اوندی ایتلی کردار کشی تھئی هط، ایتلے "کلیشے" بݨائے ڳئین، ایتلاں افواہیں کھنڈیاں ڳئین جو اینجحی دُدھݨ بݨی ہے جیندے وچ آصف علی زرداری دے پولیٹیکل کیرئیر دی درست پرکھ پرچول ٻہوں اوکھی تھی ویندی ہے۔
آصف علی زرداری دی پالیٹکس دی سرت سنڄاݨ کنوں پیلھوں ساکوں پالیٹکس دے ݙو تھیوریز [درشنیں) کوں چیتے رکھݨا پوسی۔
ہک درشن (تھیوری۔ پرسپیکٹو) کارل شمٹ دا ہے۔ اوندے موجب ہر او ایشو تے جھیڑا جیڑھا سڄݨ دشمن دی ونڈ بݨا ݙیوے، آپت تے اپرپ دا وَکھرپ گھن آندے او پولیٹیکل ہوندے۔ کارل شمٹ سانگے پالیٹکس دا فیلڈ شدید جانبداری تے ݙونگھے جذبات دا فیلڈ ہوندے۔ جیویں پراݨا آکھاݨ ہے جو دشمن دا دوست وی دشمن بݨ ویندے۔
ݙوجھی پاسیوں ہک ٻیا جرمن پولیٹکل فلاسفر ہیبر میس ہے۔ او آہدے جو پالیٹکس تے خاص کر ڈیموکریٹک پالیٹکس وچ جذبات دی بجائے کمونیکشن تے ڈائیلاگ اتم ہوندن۔ ایں کمونیکشن تے ڈایئلاگ نال چھیکڑ وچ ہک اینجھا اتفاق۔ کنسینس نکلدے جیندے نال پالیٹکس تے سوسائٹی اڳوں ودھن۔
ݙوجھے شبدیں وچ کارل شمٹ پاسیوں پالیٹکس کوں " شدید جانبداری تے جذبات" دا فیلڈ سمجھیا ویندے۔ سیاست تے جنگ ہکو سنواں بݨ ویندن۔ ٻئی پاسیوں ہیبر میس موجب دلیل، ڳالھ کمہاڑ، سمجھݨ سمجھاوݨ پالیٹکس کوں اڳوں ودھاوݨ دے سَندر سلو ہن جیڑھے یورپ دی "اینلائٹمنٹ" "ماڈرنائزیشن" پچھوں اُتم ہن تے انہیں نال اڳونہاں سوشل آرڈر چلسی۔
انہیں ݙو انتہائی پرسپیکٹوز۔ درشنیں وچالے ہک تریجھی پوزیشن ہے جینکوں "ایگونیسٹک پالیٹکس" آکھیا ویندے۔ ایگون یونان دا سپورٹس (کھیݙ) دا ہک دیوتا ہے۔ ایگون دا مطلب ہے مقابلہ کرو، ڈٹ کنیں مقابلہ کرو، ہک ٻئے کوں پورا چیلنج کرو۔جیت دی سٹریٹجی بݨاؤ، مخالف دی کمزوری نال کھیݙو۔ ایں سبھ دے باوجود کھیݙ کوں جیوݨ موت دا مسئلہ نہ بݨاؤ۔ مخالف دا آدر رکھو۔ جیت ہار نال کٹھے ٹردے ریہو۔
ایگونئیزم کارل شمٹ تے ہیبر میس دے ݙو انتہائی تھیوریز دا "سینتھئسس" ہے۔ کارل شمٹ دے آکھے ہوئے اصول موجب ایندے وچ مقابلہ ہے، جذبات دی پرفارمینس ہے، کھیݙ دے داؤ پیچ ہن ۔ ݙوجھی پاسیوں ہیبر میس دے دلیل تے ڳالھ مہاڑ کوں ایگونئیزم ہک پریتی جاہ ݙیندے تے اینکوں اڄوکی ڈیموکریسی دی بݨیاد سمجھدے۔
ہݨ جے اساں آصف علی زرداری دے پولیٹیکل کیرئر کوں ݙیکھوں تاں او ایگنونیسٹک پالیٹکس دا ہک ماڈل ہے۔ ایندے وچ سٹرگل ہے، چیلنج ہے، مقابلہ ہے۔ پر اے سٹرگل تے مقابلہ کݙاھیں وی جیوݨ مرݨ دا مسئلہ نئیں۔ مخالف دا ہک خاص آدر ہے۔ اوندی انسانیت کنیں انکار نئیں۔
ایں سانگے ٻہوں کجھ لکھیا ونڄ سڳدے پر میں اپݨی ڳالھ کوں چھیکڑ وچ ایں "اَبزرویشن" تے ُمکیساں جو پاکستان دی پالیٹکس جیڑھی "ڈیمویٹک ٹرانزیشن" دا پندھ کریندی پئی ہے، ایں صورتحال وچ آصف علی زرداری تے اوندی پالیٹکس وادی سندھ دے لوکیں تے نیٹوز کیتے ہک سوبھ ہے۔
