پی ٹی آئی دی ڳجھی سرائیکی مخالفت ۔ ہک لنُڈی چاج شیٹ

کجھ مخالف سنڄاپوں ہوندن۔ اینجھے سنڄاپوں مخالفیں دی ڄاݨ کاری ہووݨ پاروں انہیں دی کجھ ݙک ٹھل تھی سڳدی ہے۔ سرائیکیں کیتے اینجھے سنڄاپوں مخالفیں دی مثال پنجاب تے اوندی نمائندہ جماعت مسلم لیگ (ن) ہے۔ ایندے مقابلے وچ کجھ ڳجھے تے اݨ ڄاݨ مخالف ہوندن۔ سرائیکیں کیتے ایندی مثال پی ٹی آئی ہے۔ ایندیاں کجھ مثالاں اے ہن۔

(1) جنوبی پنجاب صوبہ محاذ دا ڈھکوسلا بݨا کنیں سرائیکی صوبہ دی تحریک کوں ونڈݨ تے کوڑ پلال نال انہیں کوں اپݨے جینوئن مینڈیٹ کنیں وانجا کرݨ

(2) آئینی ترمیم موجب ٹھہائے سرائیکی صوبہ دے جغرافیہ کنیں بکھر تے میانوالی کڈھ کنیں سرائیکی وسیب دی ونڈ کرݨ۰ میانوالی سرائیکی وسیب دے پاݨی تے دریاویں دی شاہ رڳ ہے جݙاں جو بکھر لکھاں ایکڑ رقبے کوں پنجابی لینڈ کالونائزیشن دے چک وچ ݙیوݨ سنواں ہے۔

( 3) پورے ترائے سال سرائیکی صوبہ دے بل کوں پارلیمنٹ وچ پیش نہ کرݨ۔ جے اے صوبے دا آئنیی بل پارلیمنٹ وچ پیش تھی ویندا تاں کھیر پاݨی ݙوھیں انج تھی ویندے۔ اے ڳالھ کھل کنیں سامہݨے آ ویندی جو کیڑھی پارٹی سرائیکی صوبہ دی حامی ہے تے کیڑھی مخالف ہے؟

(4) جنوبی پنجاب سیکریٹریٹ کوں ملتان تے بہاولپور وچ ونڈݨ دا پکھنڈ کر کنیں صوبے دے ایشو کوں پچھوں کرݨ تے سرائیکی وسیب کوں ونڈݨ دا ترلا کرݨ۔

(5) سرائیکی ٻولی تے کلچر دے ودھارے دی بجائے پنجاب کلچر ڈے کوں سرکاری سرپرستی وچ منا کنیں سرائیکی سنڄاݨ دے خلاف ہک محاذ کھڑا کرݨ دا ترلا کرݨ

(6) سرائیکی وسیب وچ ہائر ایجوکیشن دے اداریں کوں مکمل نظر انداز کر کنیں چھڑا تریجھے سال گلابی چھڑکاؤ کرݨ (پختونخواہ وچ اے این پی پنج سالیں وچ درجناں یونیورسٹیاں بݨائین۔ سرائیکی وسیب وچ اعلانات کنیں ہٹ کوئی ہک یونیورسٹی وی نئیں بݨیٰ)

(7) سرائیکی وسیب، خاص کر اوندے نینگریں وچڈیموکریٹک پولیٹیکل کلچر دے ودھارے دی راہ روک، سرائیکی ریت روایت دے اپٹھ، فاشسٹ مذہبی آمریت پسندی دے رویے کوں ودھاوݨ۔