سݨ سانول مِیر مُہاندڑا
اساں پیت پریت دے پاندھڑی
ساݙے مونڈھیں مُونجھ مہار
اساں اندر تئیں مَن مونجھڑے
ساݙے لب تے کِھل مُسکار
ساݙے گزرن پل پل اوکھڑے
سر سَو سَو وہم وِچار
ساݙی سِک دے اپنے سیدھڑے
اساں اپݨی مستی تار
اساں وَسدی من دے واسڑی
ساݙے رشتے پار اُروار
اساں کمی در دے ٻانڑھیں
اساں فصلیں دے لئی ہار
ساکوں لگڑا عشق رنجھٹیڑا
ساݙی دھرتی ہیر کنوار
اساں تھل دامان دے جھومری
ساݙے نال اے وقت وِنگار
ساݙے گل وچ لُنگیاں لالڑیاں
اساں پِڑ دے ہار سنگار
ساڈے ہتھ اِچ چُپ دیاں چپڑیاں
ساہ گھنگھرو دے چَھݨکار
سݨ سانول میر مہاندڑا
اساں کرنِݨ ٻہوں کم کار
رَس گئی اے جُھمّر جھوک تے
ذرا لاڑا زور دا مار
No comments:
Post a Comment