ہُݨ ایہو راہ سُنڄاپے(بی بی دی نذر)
احسن واگھا
آپو اپݨے لیکھ ہکڑے جڳ نروان ونڈیندے
زہر پیالے پیندے
اپݨی سولی مونڈھے چیندے
ساݙے آسیو پاسیو لنگھ ڳئے
اساں کیتی کنی
نہ کئی حلقہ بگوشی منی
ست زَفران دیاں پُڑیاں چائی
اَڄ پھردے میلے میلے
لکھ گُرو سَے چیلے
توں کون ایں راݨی
آپ پھٹیڑو، سنگت ماندی
مونجھے ٻال ٻلوڑے
متَھے مُکٹ شہزادئیں آلی
بوچھݨ گنڈھ وچھوڑے
ہتھ ونڈاویں چمبے گجرے
سر تیں بار سفر دے
چوݨیں درد اندر دے
عجب تیݙے سُگھڑاپے
ٹُر ڳئیں دے آدر پالݨے
وت آس دے ݙیوے ٻالݨے
کھڑ اُلر اُلر سݙ مارݨے
ہر ہر دے سُکھ وچارݨے
روح روح دے وندلاپے
تیݙا سُوہا جوڑا پاوݨا
وت اپݨی رت وچ دھاوݨا
ہر شے دا رنگ وٹاوݨا
ہک پل وچ جُگ ہنڈھاوݨا
کوئی رمز حلاجی ڄاپے
پئی ریت ایہا ہُݨ سورݨی
تیݙے ٻوہے خلقت ٹورݨی
تیݙے در تو خُشبو چاوݨی
چُم چُم اکھیں تیں لاوݨی
وت جمل جہان ونڈاوݨی
ہُݨ ایہو راہ سُنڄاپے
